طبعاً كلنا بنستخدم الفريزر فى تخزين الخضروات و الفاكهة و اللحوم و غيره و غيره...
لكن ياترى احنا بنتعامل مع الفريزر صح.. وياترى احنا بنستخدمه و ناخد منه اقصى استفادة ممكنه؟؟
الحقيقة ان الفريزر ده كنز لا يفنى بس للى بيعرف يتعامل معاه بالشكل الامثل.. و ممكن ست البيت توفر على نفسها كتيير اوى لو اتعودت ترتب الفريزر بتاعها كويس و يمكن دى حاجة انا لاحظت ان فيه ناس كتيير مش بتهتم بيها مع انها مهمة جداً
و باشياء بسطة اوى ممكن تخلى الفريزر ده اعز صديق ليكى فى المطبخ
اولاً لازم نعرف انك لازم تعرفى ايه اللى موجود عندك فى الفريزر بالضبط.. يعنى مش كل ماتحتاجى حاجة من الفريزر تفضلى تدورى و تطلعى كل حاجة منه علشان تلاقيها... لازم ترتبى الفريزر بتاعك و تحددى مكان كل حاجة.. على سبيل المثال الرف العلوى يبقى للحوم و الدواجن و الرف السفلى يبقى للخضروات و الفاكهة او العكس
المهم انك تقدرى توصلى للشئ اللى انتى عايزاه بمجرد ماتفتحى الفريزر لانك حتبقى عارفة هو فى اى مكان بالضبط
تانى حاجة مهم اوى انك تكتبى على كل علبة او كيس محتواه.. يعنى لو انتى مثلاً حافظة تتبيلة معينة للفراخ او اللحوم حيبقى صعب اوى اوى عليكى انك تتعرفى عليها بعد التجمد بمجرد النظر.. لكن الموضوع حيبقى اسهل بكتيير لو انتى عاملة ليبل (او ورقة اسم) لكل حاجة عندك فى الفريزر تكتبى عليها ايه هو محتوى الكيس او حتى تكتبى على الكيس بالقلم الماركر.. و صدقينى ده حيوفر عليكى وقت كبير جداً،لان نظرة واحدة حتبقى كفاية انك توصلى للى بتدورى عليه بسهولة
كمان فيه حاجات يفضل انها تستخدم خلال فترة معينة من التخزين و ده بيختلف من حاجة للتانية علشان كده مهم انك تكتبى على الليبل تاريخ التخزين و التاريخ اللى يفضل استخدامها قبله
فكرة ظريفة تانية ممكن تعمليها انك تخلى دايماً ورقة صغيرة تحطيها على باب الفريزر بتحتوى على كل شئ موجود جواه و تعملى تعديل للقائمة دى اول باول بحيث انك تبقى على طول عارفة محتويات الفريزر بتاعك و تقدرى تحددى جدول اكلاتك الاسبوعية على اساسه... و الفكرة دى حتبقى مفيدة اوى خصوصاً للسيدات العاملات اللى بتبقى محتاجة تنظم وقتها فى المطبخ ... زى بالضبط قائمة الشراء اللى بنعملها كل اسبوع و نعلقها على الثلاجة
حاجات بسيطة جداً ممكن لو اخدنا بالنا منها توفر علينا كتيير... و اتمنى ان النقط اللى اتكلمنا عنها النهاردة تكون مفيدة ليكوا وان شاء الله نتكلم عن حاجات تامية مفيدة فى المرات اللى جاية
فى رعاية الله
0 comments:
إرسال تعليق