طريقة عمل صوابع زينب من مطبخ نونى بالصور

صوابع زينب نوع من انواع الحلويات الشرقية الرائعة و فى نفس الوقت مقاديرها و طريقتها سهلة جدا و بسيطة و مش محتاجة ادوات و لا حاجة و باذن الله تعجب كل اللى ح يدوقها
يلا نقول بسم الله ونبدأ

المقادير

250 جرام دقيق ( 1/4 كيلو )

75 جرام سميد

75 مللى زيت ( 4-5 معالق كبيرة )

4-5 جرام خميرة 

100 مللى ماء (1/2 كوب)

زيت للقلى

الشربات

2 كوب سكر

1 كوب ماء

عصير ليمونة بعد الغليان

الطريقة

اول حاجة نضيف السميد على الدقيق ونقلبهم كويس

وبعد كده  نضيف الخميرة و نخلطهم مع بعض

و بعد كده نضيف كمية الزيت و نقلبهم بحيث انهم يختلطوا و يبقى  الزيت متجانس مع الدقيق و يبقى الخليط بالشكل ده 

وبعدين نبدأ نضيف الماء عليهم ونعجن العجينة كويس اوى لحد ما تلم معانا و يبقى ده شكلها

ولازم العجينة تبقى الى حد ما ناشفة معانا ولو حسينا انها طرية اوى نزودها شوية دقيق 

بس ان شاء الله المقادير كده مظبوطة ومش هتحتاج اى اضافات 

وبعد كده نغطيها ونسيبها ترتاح حوالى 5 دقايق

و بعد ما ترتاح نقطعها قطع صغيرة ونصبعها زى ماهى فى الصورة كده و نراعى ان الخميرة حتخليها تنفش فى الزيت

وبعدين نجيب المبشرة و نستخدم الجزء الضيق منها ونجيب العجينة و نضغط عليها و احنا بنلفها عكس اتجاه بروز الفتحات بالشكل ده

يارب الصورة تكون واضحة و فى النهاية حيكون ده شكلها و المقادير دى بتعمل ضعف الكمية اللى فى الصورة تقريباً

وبعدين ننزل بيها فى الزيت السخن و مش بتاخد وقت خالص

 و نقلبها علشان تاخد لون واحد من جميع الجهات

وده شكلها لما بدأت تاخد اللون الذهبى

واول ما يبقى لونها ذهبى نطلعها من الزيت ونحطها على طول فى الشربات البارد اللى هنكون محضرينه من قبل كده

ولازم تكون صوابع زينب سخنة والشربات بارد عشان تشرب الشربات كويس 

وده شكلها النهائى فى طبق التقديم 

يارب الوصفة تكون عجبتكوا و بالف هنا و شفا

فى رعاية الله