النهاردة حابة اتكلم عن حاجة صغيرة اوى لكن بتفرق كتيير فى سرعة تحضير الاكل و تقليل الوقت اللى بتقضيه فى المطبخ و يمكن ناس كتيير مش بتاخد بالها منها و لا بتستخدمها و هى المياة الساخنة
فى معظم الاكلات بتحتاجى تضيفى ماء و اوقات بيبقى فى نص الطبخة زى مثلاً لو كمية السوائل اللى فيها قلت او لما تكونى لازم تاخدى الاكل الاول بلانشيه قبل اضافة الماء و هكذا...و فى الحالة دى درجة حرارة الاكل و الاناء بتبقى مرتفعة و ده اللى احنا بنحتاجه علشان عملية الطهى و لو ضيفتى ماء بارد او درجة حرارته قليلة زى الماء العادى, ده حيقلل من درجة حرارة الاكل و حيبطئ عملية السواء و بالتالى حياخد وقت اطول علشان درجة الحرارة ترجع تانى و اكيد ده حيطول فترة وجودك فى المطبخ و ده اللى احنا مش عايزينه خاااالص
و فى الحقيقة الحل بسيط جدا و هو انك اول ماتبدأى تطبخى تحطى كمية من الماء فى اناء و تخليها تغلى بحيث انك اول ماتحتاجى تضيفى ماء حتاخدى من الماء المغلى و بالشكل ده حتحافظى على درجة حرارة الاكل و حتبقى العملية مجرد استكمال مش بداية من اول و جديد
و دى نقطة بينصح بيها معظم الشيفات و فيه كمان ناس بتستخدم ماء من البويلر (لكن انا عن نفسى مش بفضل استخدمه)
اتمنى انى اكون قدرت اوصلكوا النقطة دى صح لانها فعلا مهمة و بتوفر عليكى اوى
و ماتنسوش احنا لسه عندنا ملحوظات و تركات تانية كتيييير.... تابعونا
فى رعاية الله
