من اللطيف فعلا انك تلاقى حد من افراد اسرتك يساعدك فى شغل المطبخ من الوقت للتانى زى مثلا زوجك او اولادك
لكن للاسف مش كل المساعدات بتبقى من النوع اللطيف و ممكن تتحول لصورة بالشكل ده
بس ده مش معناه انك تيأسى و تقولى ماحدش يساعدنى و يدخل المطبخ علشان مايكركبوش او غيره....لأ لأ خالص... الموضوع بس محتاج منك شوية تنظيم
لازم الاول تعرفى و تفهمى ان المطبخ ده مملكتك...حاجة كده زى غرفة العمليات اللى بتطلع احلى اكل فى الدنيا طبعاً و انه مكان لازم يكون منظم بالدرجة الاولى و له قواعد و نظام
يعنى مش تطلبى من حد انه يدخل معاكى المطبخ يساعدك و خلاص... لأ انتى اللى لازم تحددى للى حيساعدك ده هو حيعمل ايه بالضبط و خصوصا لو الشخص ده حد مش متمكن اوى من دخول المطبخ و لازم تحدديله الحاجة اللى حتكون مناسبة ليه يعنى مثلا اولادك -خصوصاً لو صغيرين فى السن-لازم تكون مساعدتهم ليكى بعيد عن البوتجاز و السكاكين يعنى مثلا يشيلوا الادوات اللى انتى مش محتاجها فى اماكنها، يساعدوكى فى تقطيع عجين او يحضرولك ادوات و اوانى.... الحاجات دى ممكن تكون بسيطة لكن بتوفر عليكى وقت و مجهود و بتساعدك فعلا
اما بقى لو شخص كبير ممكن يساعدك فى مراقبة الفرن...تقليب الاكل على النار...غسيل الاوانى و برضو ده بيكون على حسب كل شخص و نوع شخصيته... يعنى مثلا فيه ازواج كتيير ممكن يرفضوا فكرة انهم يغسلوا الاطباق لكن انتى ممكن تخليه يساعدك بس بانه ينشف الاطباق اللى انتى بيتغسليها و مش لازم انك تجيبه الموضوع بشكل مباشر لكن يبقى كأنه وقت ظريف بتقضوه مع بعض و تتكلموا و فى نفس الوقت يكون بيساعدك
انتى ممكن بذكائك تخلى دخول الاخرين المطبخ معاكى مكسب ليكى مش خسارة لكن زى ما قلنا فى الاول لازم تفكرى و تحددى المساعدة اللى ممكن تحصلى عليها من كل واحد حسب طبيعته و سنه.. بس كده
فى رعاية الله
0 comments:
إرسال تعليق