زهقتى من الفطار و العشاء التقليدى...
بتحبى البيض و بتحبى تعملى منه اصناف مختلفة...
عايزة اطفالك ياكلوا البيض من غير مايتضايقوا...
عايزة حاجة بسيطة و سهلة و كلها قيمة غذائية...
يبقى جربى حواوشى البيض السريع من مطبخ نونى و اتحداكى لو مااتطلبش منك كل يوم
يلا نقول بسم الله
مكوناتنا بسيطة و سهلة جداً
شرائح طماطم
شرائح فلفل رومى اخضر
شرائح فلفل الوان
زيتون اسود مقطع
جبن شيدر
بيض
ملح-فلفل
عيش بلدى
وممكن تغيرى و تبدلى اى مكون حسب رغبتك يعنى ممكن زيتون اخضر بدل الاسود
وممكن بدل الجبن الشيدر تستخدمى جبن رومى ويا سلام لو موتزاريلا
بعد ما نتأكد ان مكوناتنا كلها جاهزة حنشغل الفرن على اعلى درجة و نجهز صينية الخبز و نفرشها ورق زبدة
و نجيب العيش البلدى و لازم نتأكد ان الرغيف يكون سليم و مافيهوش قطع من القاع او الجوانب علشان البيض مايخرجش منه
و ممكن نعمله فى عيش شامى لكن البلدى مفيد اكتر لانه بيحتوى على الردة
و نفتح فتحتين من الاعلى زى الصورة كده بحيث اننا نقدر نوصل لكل الاركان
بعد كده نرص شرائح الطماطم و الفلفل و الجبنة جوه الرغيف من الفاتحة اللى عملناها مع قطع الزيتون
و ياريت نخلى الطماطم من القلب والبذور
و بعدين نضرب بيضتين كويس مع ملح و فلفل و نصبهم جوه الرغيف على المكونات
ونتأكد انه وصل لكل الجوانب و بعدين نقفل الرغيف كويس و ندخله الفرن حوالى 15 دقيقة او لحد مانتأكد ان البيض استوى
و بيطلع مقرمش و لذيذ و الوانه حتخلى الاطفال يحبوه وكمان قيمته الغذائية عالية لان فيه بيض و خضروات
و لو تحبيه طرى ممكن تقفلى عليه ورقة الزبدة
ودى صورة للحشو بعد ما استوى و الجبنة ذايبة مع البيض
جربوه و باذن الله حيعجبكوا
و بالهنا و الشفا
فى رعاية الله
0 comments:
إرسال تعليق