المطبخ 1

يمكن فيه مننا ناس كتيير بتقضى فى المطبخ وقت طويل بس اكيد فيه ناس تانية المطبخ ده بالنسبة لهم "هذا المكان الغامض" اللى يمكن يكونوا كمان بيخافوا يدخلوه بس انا احب اطمنهم المطبخ مش مكان غامض و لا حاجة احنا بس محتاجين نفهمه صح و بحاجات بسيطة اوى ممكن يكون مكان بنحب ندخله و نستخدمه.. كل الموضوع شويه تنظيم مش اكتر

فى الاول لازم نعرف ان مش لازم يكون عندنا مطبخ وااو علشان نعمل اكل وااو، لكن اكيد مكان منظم و مصمم بطريقة صح حيخلى الطبخ عملية سهلة و مريحة بس ده برضو مش معناه بالضرورة اننا نغير تصميم المطبخ.. ابداً.. ممكن اعادة تنظيم الاشياء و الادوات جوه المطبخ يكون كافى جداً

الفيصل هنا هو تنظيم المطبخ و حركتنا جواه اللى لازم يكونوا عمليين

اهم حاجة فى تصميم المطبخ هو مثلث الحركة فى المطبخ و هو ببساطة المثلث اللى بيربط بين 3 حاجات :

1 - الحوض

2 - الثلاجة

3 - البوتجاز

و ده مثال له

و زى ما الصورة بتوضح لنا الحركة بين التلات حاجات دوول لازم تكون حركة سهلة و مافيش حاجة بتعوقها زى مثلا ترابيزة او سبت خضار او غيره و يفضل ان الثلاجة تكون فى المكان الاقرب للباب بحيث ان اى حد محتاج حاجة منها ما يدخلش فى مثلث الحركة بتاعك علشان ما يضايقكيش
و المثلث ده ممكن يتطبق مهما كان شكل مطبخك زى الصورة دى

حاجة كمان بسيطة جدا و مهمة اوى هى رخامة المطبخ او الكاونتر، تخيلى كده لو الكاونتر بتاعتك مليانة برطمانات و اطقم بهارات و مايكروويف و ماكنة قهوة و كيتشن ماشين و..و..و.. مش ده حيخلى عملية تحضير الاكل و وقفتك فى المطبخ صعبة اوى فى نفس الوقت اللى اعادة النظر فى الحاجات اللى موجودة على كاونتر المطبخ و تخزين الحاجات اللى مش بتستخدميها منها بصفة مستمرة فى اماكن تخزين مناسبة كفاية بانه يوفرلك مساحة مريحة للحركة و الشغل فى المطبخ و هو ده اللى احنا عايزينه بالظبط... مش كده؟