تعالى اتعرفى مع نونى على ادوات المطبخ

النهاردة حنتكلم مع بعض على ادوات المطبخ الاساسية اللى بنحتاجها فى المطبخ و هى الادوات اللى نقصها ممكن يسبب لنا مشكلة و احنا بنشتغل لكن فى الاول لازم ناكد ان مش لازم الادوات اللى عندنا تكون احدث حاجة او اغلى حاجة... المهم ان ادواتنا تكون جودتها و صناعتها كويسين و كمان نكون مستريحين و احنا بنستخدمها لان ده اكيد حيوفر علينا وقت و مجهود و كمان حيخلينا نشعر بالراحة واحنا بنشتغل... وحنبدأ مع بعض دلوقتى بالادوات الاساسية

السكاكين:

1- سكينة الشيف:

انتى ممكن- فى الحقيقة لازم - تستخدمى سكينة واحدة فى الفرم و التقطيع الى شرائح او قطع صغيرة او غيره. و دى عادة بتسمى بسكينة الشيف او السكينة متعددة الاغراض.. و بالبلدى كده بتبقى ايديك و رجلك فى المطبخ. السكينة دى بقى شفرتها او نصلها بيكون حوالى 6-8 انش يعنى تقريبا 15-20 سم بدون شرشرة

و السكينة الكويسة هى اللى تخليكى حاسة بالراحة و انتى مسكاها و متحكمة فيها يعنى تكون تقيلة كفاية انها تخليكى تقطعى بثبات و ثقة و فى نفس الوقت خفيفة كفاية انك تستخدميها بسهولة... و حتلاقى اشكال و استايلات كتييرة فحاولى تختارى السكينة المناسبة ليكى و اهتمى ان القطعة دى بالذات تكون من ماركة كويسة و مش رخيصة لانها حتعيش معاكى و زى ماقلنا هى اكتر واحدة حتستخدميها و كمان هى قطعة الامان بيكون عامل مهم فيها علشان كده بلاش نوفر و احنا بنشتريها.

2- سكينة التقشير و الخلى:

كمان حتحتاجى سكينة حادة غير مشرشرة للخلى و التقشير.. و دى بتكون صغيرة اوى بالمقارنة بسكينة الشيف لكن برضو لا تقدر بثمن من ناحية اهميتها و استخدامتها الدقيقة فى المطبخ. حتحتاجيها فى تقشير الخضروات و خلى اللحوم و ازالة البذور تقطيع الخضروات الصغيرة و غيره و غيره، هى فعلا مهمة ليكى.

3- المسن:

السكاكين اللى جودتها عالية بتعيش معاكى العمر كله بس لازم تعرفى ازاى تحافظى عليهم كويس...و من الحاجات اللى انتى محتاجاها فى الموضوع ده مسن مناسب علشان تقدرى تحافظى على السكاكين بتاعتك حامية دايماً و المسن كمان لازم يكون من نوع كويس و مناسب لنوع السكاكين اللى حتختاريه.

4- سكينة الخبز:

سكينة الخبز بتكون طويلة رفيعة و مشرشرة و تقدرى تستخدميها فى تقطيع الخبز و المخبوزات و الكيك و النوع الكويس منها حيعيش معاكى طول العمر.

لوحة التقطيع:

دى اداة مهمة و مفيدة جدا ليكى لان معظم شغلك فى التقطيع حيكون عليها... و ممكن تجيبى منها اشكال و انواع كتيير ما بين البلاستيك و الخشب ... و يفضل انك تخصصى لوحة لتقطيع البصل و الثوم و الكرات لان انواع الخضروات دى صعب انك تزيلى الروايح بتاعتها من اللوحة بسهولة علشان كده تجنبى انك تستخدميها مع حاجات تانية زى الفواكهة مثلا او المكسرات لان ساعتها الحاجات دى حيبقى فيها الروايح الغير محببة دى و كمان لازم تخصصى لوحة تانية لتقطيع اللحوم و الاسماك و الفراخ علشان تمنعى التلوث الغذائى فى مطبخك

و لازم تغسلى لوحة التقطيع بالماء و الصابون و تنشفيها كويس بعد كل استخدام.

حلة الشوربة و الطبيخ:

الحلة دى حتستخدميها كتيير سواء فى عمل الشوربة و الطبيخ او سلق المكرونة علشان كده حاولى تختارى حجمها وسط علشان توفرى مكان كذا واحدة باحجام مختلفة فى مطبخك... كمان حاولى ان نوعها يكون مناسب لدخول الفرن لان فى اوقات حتبدأى الوصفة على البوتجاز و بعدين تغطيها و تدخليها الفرن و كمان قاع الحلة لازم يكون سميك لانك حتحتاجى ساعات تشوحى الاكل الاول و القاع الرفيع مش بيوزع الحرارة كويس.

المقلاة أو الطاسة:

من اكتر القطع اللى حتستخدميها فى المطبخ مقلاة او طاسة مقاس 25-30 سم علشان كده انك تشترى نوع كويس هنا كمان مهم لكن برضو مش معناه ان سعرها يبقى غالى.. فيه انواع كتيير تختارى منها الاستلس و التيفال و غيره. و طاسة مقاس 16-20 سم مهمة كمان فى الاستخدامات البسيطة زى قلى البيض و كميات الطعام الصغيرة.

كسرولة و صوانى: