ده كان الطبق الرئيسى على سفرة فطارى النهاردة
سلطة الجبنة القريش مع الخضار
مش عارفة ليه ناس كتيير مش بتحب الجبنة القريش او مش بتفتكرها مع ان فوايدها كتيييييير
زى مثلاً ان نسبة البروتين فيها عالية جدا بعكس نسبة الدهون اللى حنلاقيها قليلة اوى بالمقارنة بباقى انواع الجبن
علشان كده تلاقوها مشهورة جدا فى انظمة الرجيم
مممم يمكن صحيح عشان كده الناس مش بتحبها لانها مفروضة عليهم :) ممكن برضو
مع انها و الله مهمة و مفيدة فعلا للصحة
ده حتى العالم الروسي ميتشنكوف كان قال في دراسة له في بدايات القرن العشرين إن شعوب دول البلقان (جنوب شرق أوربا) بتتميز بالعمر الطويل وقال ان ده بسبب كثر استهلاكهم لمنتجات الألبان المتخمرة (زى الجبنة القريش يعنى)
يعنى بالعربى كده اللى عايز يعيش كتيير ياكل جبنة قريش كتيير :)
و يا سلام بقى لو ضيفنالها الخضروات الطازة زى ما انا عاملة كده يبقى بنزودلها قيمتها الغذائية جداااااااا... و كل ما نوعنا فى الخضار و الوانه الفايدة تزيد اكتر و اكتر
انا هنا مثلا حاطة فى الطبق ده
جبنة قريش
طماطم
خيار
جزر
بصل اخضر
بقدونس
زيت زيتون
ملح
و طبعا ممكن فلفل الوان بس انا مش حاطة
ياريت نرجع تانى ندخل الاطباق اللى فيها قيمة غذائية عالية فى يومنا، يعنى طبق زى ده مش محتاج وقت فى تحضيره لكن لما حيكون موجود على السفرة فى الفطار او العشاء بالوانه الجميلة دى و طبعا طريقة التقديم الشيك ح تفتح النفس و حيبقى منظر السفرة متغير و احلى من شكلها باطباق الجبن العادية التقليدية
و صدقونى الشكل بيبقى عليه عامل كبييير و بيفرق من اللى بتعرف تطبخ
واللى مش بتعرف ولا انا غلطانة
وبالهنا و الشفا :)
0 comments:
إرسال تعليق