أصدقائك فى المطبخ 2

لما اتكلمنا المرة اللى فاتت عن البوتجازات و انواعها

اتكلمنا عن الجزء الاساسى اللى هو ال cooktop او البوتجاز من فوق... النهاردة بقى حنشوف مع بعض الجزء المهم التانى من البوتجاز اللى هو الفرن oven و كمان المايكروويف

 

الفرن:

و الفرن شئ اساسى ماينفعش نستغنى عنه فى المطبخ لاننا بنستخدمه فى اعداد الصوانى و الحلويات و المخبوزات و اللحوم و تسخين الاكل و غيره... و دى كلها حاجات محتاجة ان الحرارة تكون مغلفة الاكلات دى من كل جانب مش من القاع بس زى البوتجاز من فوق

و الفرن ممكن يكون قطعة واحدة مع البوتجاز زى القطاع العريض اللى موجود فى البيوت بالشكل ده

 

او فرن مدمج او built-in   و النوع ده ميزته الاساسية ان مكانه بيكون فى اى جزء من المطبخ و على اى ارتفاع حسب مانحب و يكون اسهل بالنسبة لنا

و فيه النوع اللى يشبه المايكروويف ده

و الافران كمان فيه منها الكهرباء و فيه الغاز و ان كانت الاراء اختلفت حوالين اى نوع افضل من التانى لكن فى النهاية يفضل اختيارك للنوع الانسب لكى حسب معاييرك و ظروفك الخاصة

يعنى مثلا اذا كانت المنطقة بتاعتك الكهرباء بتقطع فيها كتيير او فيها غاز طبيعى يبقى البوتجاز او الفرن الغاز افضل بالنسبة لك و هكذا

ودلوقتى نشوف بعض الخصائص الموجودة فى الافران و اللى ممكن تشكل عامل من عوامل اختيارك للفرن:

امكانية تشغيل الفرن و الشواية:

الخاصية دى بتسمح لك انك تحطى الصينية تستوى و فى نفس الوقت وشها يتحمر او يبقى الفرن شغال من تحت لتسوية صينية و الفرخة بتتشوى و ده طبعا بيوفر فى الوقت 

غرفة التسخين:

ممكن تستخدمى الغرفة الخاصة الموجودة تحت الفرن دى علشان تخلى الاكل يحتفظ بدرجة حرارته و توفرى وقت تسخينه تانى

المروحة:

المروحة الموجودة فى الفرن بتعمل على توزيع الحرارة بشكل متساوى داخل الفرن و دى حاجة حتساعدك اذا كنت من النوع اللى بيحب دايما يعمل انواع الكيك و المخبوزات المختلفة

التنظيف الذاتى:

فيه بعض الافران بيكون فيها الخاصية دى وبتكون عن طريق زرار بيرفع درجة الحرارة داخل الفرن الى درجات عالية جدا و بعد ما يبرد تقدرى تشيلى الرماد المتخلف من العملية دى بسهولة جدا

المايكروويف:

 

استخدام المايكروويف فى عملية الطهى مختلف تماما عن الافران العادية و فى الحالة دى لازم تتبعى قواعد مختلفة 

و مع ذلك معظم الناس بتستخدم المايكروويف فى عملية تسخين الاكل او الاطعمة المجمدة و فى الحالة دى انتى مش محتاجة نوع غالى و له خصائص متطورة 

وحاجة مهمة لازم نخلى بالنا منها ان المايكروويف مانقدرش نستخدم فيه معدن... ممكن فقط نستخدم فيه الزجاج اللى ممكن يدخل المايكروويف، بعض انواع البورسلين و السيراميك، الورق و بعض انواع البلاستيك (لكن الابحاث اثبتت ان البلاستيك ممكن يضر بالاكل و يفضل عدم استخدامه فى المايكروويف)  و بعض الانواع ممكن نستخدم فيه ورق الالمونيوم 

و فى كل الاحوال المايكروويف مش بديل عن الفرن العادى خصوصا فى عملية التحمير و الشوى و افضل استخدام له هو التسخين فقط

ولازم نقرأ كتيب التعليمات بتاعه كويس اوى قبل ما نستخدمه و نشوف ايه المسموح و ايه الممنوع فيه لان مش كل انواع الاطعمة ممكن تدخل المايكروويف زى البيض مثلا

المرة الجاية ان شاء الله حنكمل مع بعض بقية الاصدقاء

فى رعاية الله