تعالى اتعرفى مع نونى على ادوات المطبخ 2

تعالوا نكمل مع بعض بقية ادوات المطبخ اللى ح نستخدمها

• شياطة:

حتحتاجيها ساعات فى توزيع و تقليل الحرارة وقت الطهى لو محتاجة تطبخى او تطهى اكل لمدة طويلة بدون مايتحرق القاع زى الرز مثلا 

• مساكات المطبخ:

اختارى منهم احجام مختلفة و حتلاقى اشكال كتيير منهم و اختيارهم يرجع لذوقك لكن دايما خليهم جنب البوتجاز فى درج او متعلقين على الحيطة و احرصى دايما انهم يبقوا ناشفين لانهم لو فيهم ماء ممكن توصلك حرارة و الغرض منهم يتلاشى

• الزبدية/ البولة:

اختارى منهم احجام مختلفة من الصغير للكبير و من العميق للمسطح لانك حتستخدميهم كتيير اوى فى الخلط و الضرب و التتبيل و التقديم و غيره... و المجموعات  الكاملة حتبقى ظريفة و حتوفر مساحة

• المصفاة:

المصفاة بتاعتك لازم تكون كبيرة كفاية علشان تقدرى تصفى فيها المكرونة و ممكن تستخدمى واحدة تانية اصغر لغسيل الخضار و الفواكهة و الاعشاب

و النوع الضيق منها مفيد جدا فى نخل الدقيق و السكر او تصفية المعلبات مثلاً

• مجموعة الملاعق الخشبية:

الملاعق الخشبية لا غنى عنها و خصوصا لو بتستخدمى ادوات تيفال فى مطبخك و حتلاقى منها اشكال و احجام مختلفة و فى نفس الوقت سعرها معقول جدا... حاولى تحفظيهم فى علبة مناسبة جنب البوتجاز لسهولة الاستخدام

• السباتويلا:

اشكالها و انواعها كتيير و لازم يكون عندك منهم خصوصا النوع المطاطى لانه مقاوم للحرارة و حيفيدك مع الحاجات السخنة...

و كمان النوع ده مفيد جدا لو انتى محتاجة تقلبى اومليت او برجر

• المضرب السلك:

اداة مهمة جدا و حتلاقى منها الصغير و المتوسط  و الكبير و حتقدرى تستخدميها فى حاجات كتيير و كمان فى منها نوع سليكون علشان تتعاملى بيه مع الحاجات السخنة و كل ماكان عدد اللفات فيه اكتر كل ما كان احسن.

• ماسك اللحوم:

مفيد جدا و مهم... شوفى كده الشيفات المحترفين بيستخدموه ازاى و ازاى بيفيدهم فى شغلهم و حتتأكدى بنفسك

لسه فيه ادوات تانية لكن نكملهم مع بعض فى مرة جاية باذن الله



فى رعاية الله