طريقة عمل تارت تاتان بالصور

تارت تاتان طبق حلويات من الاطباق الفرنسية الشهيرة جدا و الغريب ان الطبق ده اصلاً بدايته كانت عن طريق الخطأ لما واحدة من الاخوات تاتان كانت بتعمل تارت التفاح التقليدى علشان تقدمه للزبائن فى فندقهم القريب من باريس و غلطت و حطت التفاح تحت و غطته بطبقة العجين و لما قدمته للزبائن لاقى استحسانهم جدا و اصبح واحد من الاطباق الشهيرة و كان سبب فى شهرة الفندق كمان

تعالوا نشوف مع بعض طريقته السهلة جداً جداً

للاسف انا ماصورتش الخطوات من مطبخى علشان كده انا جبتهلكوا من فيديو اجنبى عندى

المقادير

1 كوب سكر (200جرام)

عجينة باسترى او عجينة تارت (300 جرام)

5 م ك زبدة (75 جرام)

8 حبات تفاح اصفر/ ذهبى

الطريقة

اول خطوة ح نقشر التفاح و نقطعه اربع و نشيل القلب كده

و بعدين حنجيب طاسة او صينية جدارها عالى و قطرها حوالى   25 سم و ندهنها بالزبدة كويس فى كل مكان بالشكل ده

و نخلى بالنا اننا حندخلها الفرن يعنى ما يكونش ايديها خشب او حاجة ممكن تتاثر بالنار
 

ونرش كمية السكر اللى عندنا فوق الزبدة فى كل مكان كده كويس و نسيب معانا بس حوالى 3-4 معالق 

و نبدأ نرص قطع التفاح داير ما يدور و نخلى قلبه لفوق زى الصورة 

و لما نخلص اول طبقة نرش 3-4 معالق السكر اللى شيلناهم قبل كده على التفاح و نبدأ نرص الطبقة التانية بالعكس يعنى قلب التفاح المرة دى يبقى لتحت كده

و ده شكلها لما خلصنا الكمية كلها

بعد كده نفتح عليها نار عالية و نسيب السكر و الزبدة يكونوا كراميل فى القاع لمدة حوالى 10-15 دقيقة

و نختبر الكراميل عن طريق اننا نشيل قطعة تفاح و ندخل السكينة فى القاع و نشوف لون الكراميل 

احنا عايزينه يبقى لونه ذهبى بس مش غامق خلى بالكوا

الكراميل اللى فى الصورة دى مش باين انه ذهبى اوى

و بعدين حنشيل الصينية من على النار و نسيبها تبرد شوية و فى الفترة دى حنفتح الفرن على درجة حرارة 220 (عالى) و حنفرد العجينة بتاعتنا

المفروض قطر العجينة يبقى اكبر من قطر الصينية بحوالى 1 سم

و بعدين نشيلها على النشابة و نغطى بيها الصينية كده

و نبدأ بالراحة ندخل الحروف بتاعت العجينة حوالين التفاح و نغطيها كويس بس نخلى  بالنا علشان ما نتلسعش من الكراميل

و ندخلها الفرن على درجة حرارة 220 لمدة 15 دقيقة و بعدين نقلل درجة الحرارة ل 180 لمدة 15 دقيقة كمان

و بعدين نطلعها و نجيب حاجة مسطحة - صينية تقديم مثلاً- بس تكون اكبر من الصينية بتاعتنا و نحطها على الصينية من فوق كويس و نمسك الاتنين كويس مع بعض و نقلبها بسرعة و طبعا لازم نكون لابسين جوانتى او ماسكينهم بفوطة كويس

و بعدين نشيل الصينية و لو لقينا قطع تفاح لازقة فى القاع نشيلها بالراحة و نرجعها مكانها على التارت 

و مهم جدا اننا نقلبها اول مانطلعها من الفرن علشان لو بردت و هى فى الصينية الكراميل اللى فى القاع حيمسك و مش حينفع نقلبها

و ده الشكل النهائى 

و ده شكل التارت بتاعى :)

يارب التارت يكون عجبكوا و جربوه صدقونى مش ح تندموا

و بالهنا و الشفا

فى رعاية الله