أصدقائك فى المطبخ 1

احنا اتفقنا فى الاول اننا حنتعلم مع بعض كل حاجة و حنعرف ازاى ندخل و نحب دخول المطبخ و عشان كده تعالى النهاردة نتعرف على اصدقائك فى المطبخ

ايووووووة اصدقائك... اى واحدة بتدخل المطبخ لازم بيبقى معاها مساعدين يساعدوها فى المهمة اللى هى داخلة تعملها و المساعدين دول لازم يبقوا اصدقائك و تعرفى ازاى تتعاملى معاهم كويس علشان المهمة تتم بنجاح وعلشان يبقوا بيساعدوكى فعلا مش بيعطلوكى 

طيب مين هم اصدقائك دوول؟؟

اصدقائك فى المطبخ هم الاجهزة الرئيسية - و فيه كمان بعض الاجهزة الكمالية - اللى بتتعاملى معاهم طول فترة وجودك فى المطبخ و حنتعرف عليهم مع بعض واحد واحد 

1- البوتاجاز:

اول و اهم صديق ليكى فى المطبخ هو البوتاجاز لانه اكتر جهاز بتتعاملى معاه فى المطبخ  و كمان لانه جهاز فيه نسبة خطورة علشان بيبقى فيه نار و لازم نعرف نتعامل معاه صح و مهما كان بوتجازك قديم زى ده

 

او جديد زى ده مثلا
 

المهم انك تعرفى تتعاملى معاه كويس و تفهمى ازاى تشغليه و تاخدى منه افضل نتيجة لشغلك.. طيب ايه هى انواع البوتجازات

اجهزة البوتجاز بتنقسم الى:

أ- غاز:

و ده اللى بيكون مصدر الحرارة الاساسى فيه عبارة عن شعلة نار خارجة من العيون زى كده

معظم الطهاة بيفضلوا يستعملوا البوتجازات اللى بالغاز لان شعلة النار التحكم فيها بيكون بدرجة كبيرة و بسرعة و كمان كمية الحرارة فيها بتكون اعلى من بعض اجهزة البوتجاز بالكهرباء و طبعا ده بيساعد فى وقت الطبخ و التحكم فيه

لكن فيه بعض الناس اللى لسه بيبدأوا مشوارهم مع الطبخ بيخافوا من بوتجازات الغاز شوية لان فيها نار مباشرة  و كمان علشان امكانية تسرب الغاز، لكن مع اتباع اساليب الامان و التطور فى الصناعة  الفترة اللى فاتت و الخبرة المكتسبة مع الوقت بيقلل المشاكل البسيطة ده و حنبقى نتكلم بعد كده على اهم سبل الامان اللى لازم كلنا نتبعها و احنا بنشتغل فى المطبخ


ب- كهرباء:
و ده بيكون مصدر الحرارة متولد من الكهرباء و بيكون عبارة عن عيون حلزونية زى كده

او عيون مسطحة زى كده

و النوع الاحدث اللى هو السيراميك او الرخام و ده بيكون بالشكل ده مثلا

والنوع ده فيه ناس كتيير بتستريح اكتر فى التعامل معاه و طبعا ميزته الاساسية هى عدم وجود نار مباشرة لكن فى نفس الوقت لازم نتعامل بحذر خصوصا لو فيه اطفال علشان مش حيبقى واضح لو العيون لسه سخنة بعكس الشعلة العادية
و مع ذلك فى الانواع الجديدة زى الصورة الاخيرة بيبقى فيه مؤشر يبين اذا كانت العيون لسه سخنة و لا باردة


اما النوع الاجدد فى بوتجازات الكهرباء هو النوع اللى بيكون فيه مجال مغناطيسى بين العين و بين اناء الطهى و عن طريقه الحرارة بتتنقل، و بالشكل ده اى شئ تانى (زى ايديك او فوطة مثلاً) مش بتتاثر بالحرارة و دى ميزة مهمة اوى فى الامان
و الصورة دى بتوضحلنا ازاى ان الورقة موجودة بين الطاسة و العين و مع ذلك الحرارة واصلة و المياة بتغلى و مع ذلك الورقة سليمة حتى شوفوا كده :)

لكن عيب النوع ده انه غالى جداااا و مش منتشر و كمان محتاج انواع اوانى طهى معينة زى الاستلس استيل


احنا بكده نكون اتكلمنا على البوتجاز و انواعه و تقدرى دلوقتى لو لسه بتجهزى مطبخك او بتجدديه تعرفى ايه هو النوع المناسب ليكى
و فى المرة الجاية ان شاء الله حنتعرف على الافران و المايكرويف 
فى رعاية الله