أصدقائك فى المطبخ 3

تعالوا نكمل مع بعض النهاردة بقية أصدقائنا اللى بيساعدونا فى المطبخ علشان نعمل احلى اكل و نحضر اجمل سفرة

الثلاجة:

 

الثلاجة بتعتبر حاجة كده زى الثقب الاسود فى المطبخ... الاكل بيدخل فيها و يتنسى و ما يطلعش غير فى الحملة التنظيفية القادمة و ده طبعا مش صح و ماينفعش... ترتيب الثلاجة و وضع كل شئ فى مكانه الامثل بيوفر عليكى وقت كبير و مجهود اكبر

لو قولنا مثلا ان الاسرة مكونة من 4 افراد  يبقى  محتاجة ثلاجة 16 قدم على الاقل و الافضل انها تكون 18 قدم

و لازم الثلاجة زى ما قولنا قبل كده مكانها يكون مناسب لحركتك فى المطبخ و كمان بابها يكون بيتفتح باكتر شكل ملائم لمطبخك... يعنى مثلا لو باب المطبخ لازم يتقفل كل مرة تحبى تفتحى فيها الثلاجة حيبقى شئ متعب بالنسبالك و هكذا

و ياريت ناخد بالنا من شوية النصائح دى و احنا بتعامل مع الثلاجة زى:

• اتجبنى تكديس الارفف بالاطعمة لان الهواء البارد محتاج مساحة من الفراغ علشان يدور و يوصل لكل الاطعمة الموجودة
• حاولى تحطى نفس الشئ فى نفس المكان كل مرة بتخزنيه فى الثلاجة علشان ما تحتاجيش كل مرة تفتحيها  تدورى على برطمان الصلصة او المايونيز ده راح فين
• معظم ارفف الثلاجة ممكن مكانها يتغير فياريت تحاولى تغيريها لحد ما توصلى لافضل تنظيم و اكتر ارتفاعات مناسبة للحاجات اللى بتخزنيها دايما فى الثلاجة
• الخضروات و الاعشاب الورقية زى البقدونس مثلا يفضل انهم يتغسلوا و يتنشفوا كويس اوى و يتلفوا بمحارم ورقيه علشان نحافظ عليهم اطول فترة ممكن لان المياه الزيادة على الخضروات المخزنة بتفسدها بسرعة
• الاكل القديم لازم يطلع من الثلاجة كل اسبوعين تقريبا و لازم نغسل الثلاجة بالماء و الصابون كل كام شهر و باذن الله حنتكلم بعد كده عن تنظيف الثلاجة و كل ادوات المطبخ بالتفصيل

 و خليكى دايما فاكرة ان لما ثلاجتك تكون نظيفة و مترتبة و مليانة بالاكل الطازج اللى بتحبيه، دى حاجة من اكتر الحاجات اللى حتشجعك انك تحبى المطبخ و تبدعى فيه كمان :)

الفريزر:

طبعا معظمنا بيشترى حاجات من السوبر ماركت او الاسواق اكتر من اللى ممكن نستهلكه فى اسبوع و اللى مش حنقدر نستهلكه الاسبوع ده الفريزر يقدر يحفظه لنا لمدة اطول... كمان لو عندنا اكل باقى ممكن نشيله فى الفريزر و يفضل طازج لحد ما نسخنه بعدين و ناكله لما يكون وقتنا ضيق او مجهدين و محتاجين ناكل حاجة بيتى... و طبعا فكرة انك تحضرى الاكل بكميات و تشيليه فى الفريزى بحيث انك وقت ماتحتاجيه يكون على التسوية او التسخين، هايلة خصوصا بالنسبة للناس اللى بتشتغل   

كمان مانقدرش ننسى تخزين الخضار فى غير موسمه او لما مثلا يبقى موجود و غالى، كل ده استخدامات مهمة للفريزر و بتساعدك ان شغلك فى المطبخ يبقى اريح... و كل ما كان طريقة تخزينك للاطعمة فى احجام مناسبة كل ما كان اسهل عليكى انك تستخدمى اللى انتى محتاجاه و بس

غسالة الاطباق:

 مش كل الناس عنها غسالة الاطباق و ممكن  كمان تعتبر من الكماليات.. لكن هى اكيد بتوفر فى الوقت و المجهود خصوصا لو افراد اسرتك اكتر من 3 او 4 .. و لو انتى عندك غسالة اطباق بقى لازم تعرفى كويس هى بتشتغل ازاى و ايه اللى ممكن يتغسل فيها و ايه اللى مش مناسب علشان تاخدى افضل نتيجة منها

احنا بكده نكون اتعرفنا على مساعدينا الاساسيين فى المطبخ و المرة الجاية ان شاء الله حنبدأ الشغل و حنتعلم الطبخ من الاف للياء و حنبدأ بأساليب الطهى... خليكوا معانا


فى رعاية الله