كوكيز البسبوسة من مطبخ نونى

 جيبالكم النهاردة من مطبخى وصفة عجبتنى ولما جربتها طلعت حلوة جدا 

  وحقيقى لازم تجربوها لأنها سهلة وبسيطة وهتعجبكوا اوى ان شاء الله 

ونبدأ بسم الله 

مقادير العجينة

1/2 1 كوب سميد ( 300 جرام )

1/2 كوب دقيق ( 80 جرام )

1/2 كوب سكر ( 100 جرام )

100 جرام زبدة 

2 بيضة

1 معلقة صغيرة بيكنج بودر

2 معلقة كبيرة جوز هند

فانيليا

مقادير الشربات

2 كوب سكر

1 كوب ماية

عصير ليمونة

الطريقة

أول حاجة هنحط كل المقادير على بعضها ماعدا جوز الهند

ونقلبهم كويس جدا 

وبعدين ندخلهم التلاجة لمدة خمس دقايق عشان العجينة تتماسك وتلم معانا

بعد ماتطلع من التلاجة نحط عليها جوز الهند 

والعجينة بتكون سهلة التشكيل بعد ما تطلع من التلاجة 

هنكورها ونبططها شوية وممكن نعمل حفرة صغنونة فى النص زى

 الغريبة كده ونحط فيها شوية فسدق أو اى مكسرات تحبيها

وبعد ماتطلع من الفرن نسقيها بالشربات البارد

الفرن

درجة الحرارة 190 لمدة 15 دقيقة

اتمنى ان الوصفة ده تعجبكوا 

وبالهنا والشفا