استغربت اوى لما لقيت ناس كتيير بتاكل البطاطس المهروسة مسلوقة كده على طول لان فى البيت عندنا طول عمرى و انا بحمرها الاول و ساعات كمان بقلى معاها بيض و بيبقى طعمها احلى بكتييييييييير لو مهروسة على طول بعد السلق زى ما حتوشفوا معايا حالاً
حنجيب البطاطس المسلوقة بتاعتنا -وطبعا احنا عرفنا مع بعض قبل كده ازاى نسلق البطاطس فى وقت قصير- و حنقشرها و نحطها فى الطاسة مع معلقتين زيت و نسيبها لحد ماتبدأ تتحمر ولما ياخد اللون الذهبى الجميل ده نقلبها على الوش التانى عشان هو كمان يتحمر
و كده البطاطس اتحمرت من الناحيتين ممكن نحط عليها ملح و فلفل و نهرسها كده او ممكن كمان نحط عليها بيض بالشكل ده
و لما البيض يبدأ يستوى نفركشه كده
و بعدين نحطها فى الطبق و نرش عليها ملح و فلفل بس نخلى بالنا مانكترش الملح لو كنا سلقنا البطاطس فى مايه و ملح
و ده شكلها بعد الهرس مممممم شكلها يفتح النفس
واحلى حاجة بقى هى قطع البطاطس المحمرة دى تحففففة
يلا بقى اللى مش بيعملها كده يجربها بالشكل ده وبالف هنا و شفا
فى رعاية الله
0 comments:
إرسال تعليق